一頭長髮已經再唔係女性嘅signature,好似導演邱禮濤一頭長髮就係佢嘅標誌。
除咗邱導,圈中亦有唔少男士,都係長髮代言人。
陳可辛
吳君如嘅導演男友陳可辛,佢嗰把柔順而又立立令嘅「秀髮」,直頭可以用嚟拍洗頭水廣告,所以君如都叫「長毛」。
蘇民峰
蘇民峰對髮型就最講究喇,咁多年嚟都係紮起,正所謂「長髮長法」,唔知係咪同法力有關啦,風水嘅嘢,真係識條鐵咩。
蔡一智
蔡一智都留有一把長長嘅頭髮,點解?會唔會係因為成日有人搞亂佢同蔡一傑呢?長髮係一智,短髮係一傑呀!
梁國雄(長毛)
長毛,有名你叫,髮型梗係唔可以變啦,之但係佢之前曾經入獄,焗住剷短,都咪話唔心痛。不過,長毛變短毛,依然霸氣十足㗎。